LAUGA AUTU : TATALAINA O LE POLOKALAME O LE “INTERNATIONAL CUSTOMS DAY” (Hon. Tuala Tevaga Iosefo Ponifasio – Sui Palemia / Minisita o Tiute ma Tupe Maua)

SAMOA, January 27 - ASO GAFUA 27 IANUARI 2024

Lau Susuga i le Ositaulaga, Susuga Mauisiisii Alama Mose Le Pulega ma le Aufaigaluega a la tatou Matagaluega o Tiute ma Tupe Maua.

E iai le manatu o lea ua mae’a ona sufi manū ma tālā fusi o tauti’aga, ua ma’ea fo’i ona momoli lapalapa o malo, ma ua sagisagi fesagai le viiga o le Atua e ou le Pule aoao, le mana, le Mamalu ma le Silisili Ese.

Ia saga viia le Atua i lana pule fa’asoa i lo outou soifua ma so matou ola. E fa’aopoopo ai le faafetai I le Susuga i le Failotu, o le sa fai o tatou sui i le va tapuia ma le Atua i lenei taeao ma faanōnō manū ma talosiaina lo tatou fa’amoemoe fa’apea fo’i faiva o lenei tausaga.

E le taumate i ana fa’amanuiaga sasa’a mai i la tatou savaliga o lena tausaga ua mavae, atoa ai ma le amataga o la tatou folauga i lenei tausaga. Ua mae’a foi ona paelago paia ua afifio nei, o le a lē toe asaina foi paia o lenei aso ma le fa’amoemoe ina ia sese fa’amatalaga. E leai a se poto ma se atamai e mafai ona autalaina, auā o paia ia e mai le vavau e o’o i le fa’avavau. A o lenei aso ma le fa’amoemoe, e talitonu lava o paia o le Atua e laugatasia ai i tatou uma. O lenei aso ma le fa’amoemoe, e lua ni vaega taua e auga iai le aso. O le vaega muamua, ae o le vaega e sili ona taua mo i tatou uma, o le avanoa tatou te fa’afo’i ai le fa’afetai i le Atua ona ua i’u manuia galuega o lena tausaga 2024, ma ua tele foi tala i manū i galuega fa’atino i le ono masina muamua o lenei tausaga.

Ua molimauina i le maualuga o le aofaiga o vaega tupe ua mafai ona aoina pe a fa’atusatusa i vaega tupe sa fa’ata’atia mai i le tala o le tupe o lenei tausaga fa’aletupe. Ua silia ma le $60miliona le tupe fa’asili ua mafai ona ausia. O se fa’asiliga tele lea vaega tupe. Viia le Atua i lana foa’i i ‘a’ao o si o tatou atunu’u, ae o lana fa’asoa i lo tatou malosi e fa’atino ai nei galuega uma. O se laolao lelei lenei e fa’aleo ai le agaga o le fa’afetai tele ma le fa’amalo i la tatou Matagaluega mo le galuega fa’atino, ma la outou tautua i lena tausaga.

E ui i le tele o lu’itau e feagai ai pea, o suiga i a’afiaga o la’au ma fuala’au fa’asaina, o le tuuina mai pea o nisi o oloa lē talafeagai, o le tele o tagatanu’u solitulafono toe fa’afo’i mai i atunu’u mamao, ae maualuga le talitonuga i galuega fa’atino ma la outou fa’amuamua i tiute, o le a mafai ai ona gafataulimaina tiute ma anavatau o la tatou Matagaluega.

O le lua o vaega. O le aso 26 o Ianuari, o se aso fa’ailogaina lea i le auaunaga a le Matagaluega e ala i le Auaunaga a le Ofisa o Tiute. O le aso ananafi na paū i ai lenei aso fa’apitoa ma o le sauniga o lenei taeao, o le amataga lea o polokalame ua fa’ata’atia mo le fa’amanatuina o lenei aso taua.

O le tū ma le aga lenei a le Ofisa o Tiute, ma ua masani ai la tatou Matagaluega i tausaga ta’itasi, i le fa’amanatuina o lea aso fa’apitoa i le lalolagi mo ali’i ma tama’ita’i, o lo’o galulue mo le puipuia o o tatou tuaoi fa’avaomalo, o le kiliaina o oloa ma fefa’atauaiga, atoa ai ma le galuega fita a la tatou Matagaluega i le aoina lea o tupe maua a le Malo. O le autu o lenei tausaga, o le fa’atauaina lea o a tatou manulauti tau’ave i le lelei fa’atino o galuega, o le mautinoa lea o le manuia ma le malu puipuia o tagatanuu .

E le fesiligia le taua o le galuega a la tatou Matagaluega, fa’apea le Ofisa o Tiute i le matafaioi o le malu puipuia o Samoa. Ua tele sui o le Palemene i ana fonotaga fa’agasolo mai lava i tausaga ua mavae e o’o mai lava i fonotaga taluai nei, ua latou fa’aleo lo latou atugaluga i le fa’afitauli o fuala’au fa’asaina ma la’au malosi. O se tasi o lu’itau tele o lo’o feagai ai ma tatou o le utiuti lea o meafaigaluega aemaise o tagata faigaluega e gafataulimaina a tatou galuega. Ua mae’a ona tatalaina aloaia la tatou masini fa’ata mo pusa oloa, o le fale ma le nofoaga e su’e ai oloa i le tausaga ua mavae. O lo’o fa’agasolo pea polokalame faa-le-a’oa’oga ina ia tapu’e le tomai ma le agava’a o la tatou aufaigaluega.

E le o malolo foi galuega fa’aleleia o a tatou polokalame fa’akomepiuta mo a tatou ofisa uma e lua, ma le naunauta’iga ina ia fa’aleleia meafaigaluega e fesoasoani i le fa’atinoina o a outou galuega. O lea ua mae’a ona fa’amaonia le toe fa’atulagaina o la tatou Matagaluega e tu’ueseeseina e avea ma ni Matagaluega e lua. E afua nei atina’e ma suiga, o le naunauta’iga o le Malo ina ia fa’atulaga lelei aufaigaluega ma ta’ita’iga, ina ia lava tapena e tali atu ma fa’atino lo tatou vala’auina.

O se tasi o vaega fa’amamafa o le fuafuaga e tu’u eseese le Matagaluega, o le naunautaiga, e ao lava ona lava le taimi o le Pule o ia matagaluega e silasila toto’a i vaega mo’omia ina ia mafai ona fa’atino a tatou manulauti. E maitau i le polokalame ua fa’ata’atia mo lenei vaiaso, e aofia lava i tatou uma i polokalame ua aumai, malo le tapena mo lenei fa’amoemoe. O le mea taua ua maitau i le polokalame, o le fa’atinoga o a tatou manulauti e pei ona autu iai le aso fa’apitoa, e le gata o le Malo, o la tatou Matagaluega, ae o le sao taua fo’i o a tatou pa’aga totino ma le mamalu o le atunu’u, e tatau lava ona amanaia i aso fa’apenei. E taua ni mataupu ua fa’atulaga mai mo a tatou pa’aga, e fa’alauiloa ai lo latou pitola’au ma le latou sao i a tatou galuega.

O la’u lu’i i lau afioga le tamaitai pule ma le matagauega i lenei tausaga. O tatou tuaoi faavaomalo. Laau ma fualaau faasaina, le aisa ua tetele i totonu o le atunuu. A’o oloa a kamupani Saina ua iai faitioga, ua le tutusa le treatment poo le faatinoga o le auaunaga o kamupani nei ma kamupani a tagata Samoa. Tele kamupani tetele e le o faamaoni i le totogiina o le TIMS, leai ni TIMS Invoices. Tele oloa e le o maua uma le tau o tiute, ma oloa ua sao mai e le tiuteina. O le ofisa o le Minisita e o’o uma mai iai le tele o finagalo faaalia o le atunuu, o faasea, o talosaga, o fautuaga ma ripoti o mea eseese. O le ala lena e maua lelei ai e le minisita le ata o mea o loo tutupu i totonu o le tatou atunuu ma le tiute lea e fautuaina ai le tatou matagaluega.

O lena ua iai le tatou scanner poo le faata o pusa oloa, e le o se scanner/faata na aumai e matamata iai, faaaoga lelei, faaaoga i taimi uma. E ese lota mafanafana pe a ou faalogo mai ua galue le scanner, ona e le pepelo le scanner, e atamai le scanner, ati le vaai a le scanner ma e aveese ai le masalosalo i ni oloa faasaina ma oloa le talafeagai i totonu o pusa o loo auina mai. E faaititia ai foi tuaiga o loo tuuina mai i le tatou matagaluega.

Tatou onosai, faamalolosi, tatou talia le aunagi mai a le atunuu. Faatino o tatou tiute e pei ona valaauina ai tatou ia tatou tali atu i le atunuu ma le alofa ma lo tatou faamaoni. O a ni mea ua tatou maua e faatino ai le galuega, ia faatino i lelei e gata ai le malosi. Ou te talitonu ua ia outou le tomai, le malosi faaletulafono, ae fautua atu pea ia o faatasi ma le faamaoni. Ia aua nei se’etia i tatou i tofotofoga, ae ia fa’atino lo outou vala’auina o ali’i ma tama’ita’i o le Ofisa o Tiute, i le sa’o ma le fa’amaoni.

O le upu faaiu ma la’u tatalo, ia Alofagia e le Atua, to mai i lagī so outou mātū palapala, e ala i ana fa’amanuiaga sasa’a mai, mo la tatou Matagaluega i lenei tausaga fou ua savalia. Ia fa’atumauina ma fa’asili pea lo outou malosi i le tino, maua ni mafaufauga lelei, le lototele aua le fa’atinoina o o outou tiute ma faiva i la tatou Matagaluega.

Ia manuia tele lenei aso ua fa’asino tonu mo outou uma. Ia lagi māina e le Atua le soifua o lau Susuga i le Failotu, maua le malosi, le tofā ma le finagalo paia mai le Atua auā tofiga ua e galue ai nei. Lau afioga i le tamaitai pule, sui pule, ofisa sili lagolago ma le mamalu o le matagaluega, Ia faamanuia pea le Atua ia te outou ae ia maua so’u ola.

Soifua ma ia manuia!

January 28, 2025